Act 1 | WSK | STEP | O Theophilus , aninga den motam motam batagem mu Jesus mel suen biya beteram, ale den suen biya kariimet nunga kausam wore ko dugu duap batagem, ulengkala nu duap te beteram

Acts 1

Jesus Korang Bur bitiruk se tairukko balam

1 O Theophilus ^{▼▼Acts 1:1 Nup Theophilus ko nunguning mu “kari Kaem ko kueso”. Luke 1:3 ago arikko.}, aninga den motam motam batagem mu Jesus mel suen biya beteram, ale den suen biya kariimet nunga kausam wore ko dugu duap batagem, ulengkala nu duap te beteram 2 se tai tom nu duruk wonong te namaram mu ko dugu duap bataguru saperem. Tom nu duruk wonong te namurukko, mu nu apostle alo ulengkala nunga balam mu Korang Bur ko sokel te den nungaram, asele nu duruk wonong te nama tarigiram. 3 Tom nu ikup giam kueram ale barasam se udagi nu tom 40 ningi kam suen biya kari ari umutang nongote aratukaso. Ale mel suen biya nuna te ikimon nu marak bagoso mamonko mu bitakaso. Ale Kaem ko kingdom ko nunga manarukaso.

4 Tom bo nu arungak baga se nunga maonam, “Nina Jerusalem me beteralko. Nina aninga Ait mel ningarukko balam mu ko kimi beteralko, ani ulengkala ko ninga manem. ^{▼▼Acts 1:4-5 Korang Bur ko den: Mat 3:11; John 14:16-17; Acts 2:33.} 5 Mu awuk, John yu te kariimet nunga anukaso. Bare tom maiya mena nina Korang Bur biyala ninga ira murok se ningimik ago terong maukko.” ^{▼▼Acts 1:5 Bala bo mu iwita: Korang Bur ninga anuwokko.}

Jesus duruk wonong te namaram

6 Tom bo tala apostle alo Jesus ilak biguwuman ale isarukasan, “Kari Biya, ni aitakta tom imi te ana Israel nanga sangaru to se aking nangata nainimi bitarnak i?” ^{▼▼Acts 1:6,8 Israel: Luke 24:21. Olekem alo sor sor namomonko: Mat 28:19.}

7 Se Jesus nunga maonam, “Mu nenenga mel mena. Kaem kota tom mel mel te aratukko mu balam, ale bitaru se ko ikiwoso. 8 Bare udagi Korang Bur nengete tai kapuruk ale sokel ningaruk, se nina aninga dugu duap Jerusalem ningi, Judea se Samaria ningi, se wonong suen la te namaral ale balalko.”

9 Jesus den mu balu kutuwuram, mu nuna ariwaman se barasam duruk wonong te tarigiram namakaso. Se ariwaman la taiti nuwi bo tairam kaluwuram. 10 Se nuna yam taiti kuali loagawaman se tairatela kari ilagala nunga guang siraram mu aratu arungu sanamaman, 11 ale balman, “Nina Galilee kari, nina anape ko sanamaman ale taiti kuali loagawasan? Jesus suwanta nukung, Kaem aru tam se duruk te namaram, mu nina ariwaman se namoso uwutatala, maingte aking tai kapurukko.” ^{▼▼Acts 1:11 Jesus peleruk tairukko: Mat 26:64.}

Nuna kari bo Judas kuwim te aratukko balukasan

12 Se apostle alo nuna Duruk Olive masan mu beteman, peleman Jerusalem namaman. Duruk Olive mu Jerusalem ko duap te pingita, ko maiya mu Juda alo Sabbath tom te aolak ilukasan namakasan iwitatala. 13 Nuna nama wonong ningi kasu naguman ale nama kuwim kualala nuna te bagakasan mu te tarigiman. Kari umu nunga nunup: Peter, John, James, se Andrew; Philip se Thomas, Bartholomew se Matthew; se James bo tala Alphaeus ko kuriang, se Simon Zealot, se Judas, nu kari bo nup James tala wore ko kuriang. 14 Kari umutang suen la ikia suwan awuman ale ngatangawakasan. Jesus ko nuam Maria, se Jesus ko uria mitak, se imet sang ago kari mu arungu ngatangawakasan.

15 Tom bo olekem 120 iwita biguwuman bagaman se Peter nomokete sanamaram, 16 ale balam, “Aga singsang, girakala Korang Bur ikia David tuam, se te Judas ko den balam se aniso mu ko nunguning aratam. Judas nu kager kari lage nunga kausam se te namaman Jesus iluman ko kari. ^{▼▼Acts 1:16 David ko den: Psalm 41:9.} 17 Nu ana apostle alo nangarak bagakaso ale nangarak ura tokaso.”

18 (Judas ko kawel beteram mu te ko koma manga tam ale ali bo te diaram. Ale udagi nu ali nukung te dagulam ale tuagu pagam ale nulis aratam. 19 Se kari suen la Jerusalem animan mu den ikiman. Se sor mu nononga den te nup beteman Akeldama. Mu ko nunguning iwita: “Ali gue ago”.) ^{▼▼Acts 1:18-19 Judas: Mat 27:3-10.}

20 Peter balam, “Israel Wur te den bo iwita aniso:

‘Noko sor am ipi anirukko,
kari bo me te bagurukko.’
Se Israel Wur te den bo tala iwita aniso:

‘Kari bo kuwim te ura taukko.’ ^{▼▼Acts 1:20 Psalm 69:25; 109:8.}
21 Buta se kari ana nangarak Jesus ilak dugu karo lagaman wore bo balnak se aratuk ale nu kuwim taukko. 22 John Jesus anuwam se Jesus ura duap beteram nama tom Kaem nu auram se kote tarigiram, kari ari mel suen biya imi karogo aringiman kari borta ana bo balnak se aratukko. ^{▼▼Acts 1:22 Nuna Jesus ko dugu duap apumonko: John 15:27.} Ale ana nangarak ura tauk, ale Jesus barasam wore ko dugu duap apurokko.”

23 Peter uwuta balam, se nuna kari ilagala nunga balu gilingiman. Bo Joseph, ko nup bo Barsabbas, se ko nup bo tala Justus. Se kari bo mu Matthias. 24 Asele iwita Kaem aru ngatangorman, “Kari Biya, ni kari suen la nunga nongomang motam ari ikiwasam. Ilagala imi aguwaya mu ni ko kuesam wore nanga kasuru se aringinak 25 se Judas kuwim te apostle ura giokko. Mu awuk, Judas ura imi beteram ale ko sor te namaram.” Uwuta ngatangaman, ale nunga munan te ikimonko awiriya sanamurukko mu ko ikimonko mu beteman se Matthias aratam. Se nu apostle 11 mu arungak bagurukko balu gilingiman.

26